Termiz davlat universitetining Tabiiy fanlar fakulteti haqida.

Termiz davlat universiteti Tabiiy fanlar fakulteti biologiya, geografiya, ekologiya va boshqa tabiiy fanlar yo‘nalishlarida yuqori malakali mutaxassislar tayyorlaydigan ta’lim va ilmiy-tadqiqot markazlaridan biridir.

Fakultet o‘z faoliyatini zamonaviy ta’lim texnologiyalari, ilmiy-tadqiqot ishlari va amaliyotga yo‘naltirilgan yondashuv asosida olib boradi. Zamonaviy laboratoriyalar, tajribali professor-o‘qituvchilar jamoasi, ilmiy-tadqiqot imkoniyatlari hamda xalqaro hamkorlik aloqalari talabalarning zamonaviy va raqobatbardosh bilim hamda ko‘nikmalarni egallashiga xizmat qilmoqda.

Tabiiy fanlar fakulteti 1965-yilda tashkil etilgan. Bugungi kunda fakultet tarkibida Zoologiya, Botanika, Geografiya hamda Ekologiya va tuproqshunoslik kafedralari faoliyat yuritadi.

Asosiy ko‘rsatkichlar

Dekan so‘zi

Bizning asosiy maqsadimiz — biologiya, geografiya, ekologiya va boshqa tabiiy fanlar sohalarida chuqur nazariy bilim hamda amaliy ko‘nikmalarga ega, mustaqil fikrlaydigan, zamon talablariga javob beradigan va mehnat bozorida raqobatbardosh mutaxassislarni tayyorlashdir.

Fakultetimizda talabalarni nafaqat nazariy bilimlar, balki laboratoriya tajribasi, ilmiy-tadqiqot ko‘nikmalari va amaliy fikrlash madaniyati bilan qurollantirishga alohida e’tibor qaratiladi.

Talabalar zamonaviy jihozlangan laboratoriyalarda amaliy mashg‘ulotlar olib borish, professor-o‘qituvchilar rahbarligida ilmiy izlanishlarda ishtirok etish, respublika va xalqaro ilmiy konferensiyalar hamda fan olimpiadalarida qatnashish imkoniyatiga ega.

Shuningdek, iqtidorli yoshlar uchun davlat va nomdor stipendiyalar, ilmiy to‘garaklar, talabalar ilmiy jamiyati, xalqaro hamkorlik va akademik almashinuv dasturlari doirasida keng imkoniyatlar yaratilgan.

Kelgusida fakultetimiz oldida ta’lim sifatini xalqaro standartlar darajasiga olib chiqish, yangi laboratoriyalar va tadqiqot markazlarini tashkil etish, xorijiy universitetlar bilan qo‘shma ta’lim dasturlarini rivojlantirish, ilmiy-tadqiqot salohiyatini yanada kuchaytirish hamda bitiruvchilarimizning mehnat bozoridagi raqobatbardoshligini oshirish kabi muhim vazifalar turibdi.

Fakultetimiz tabiiy resurslar va ekotizimlarni ilmiy asosda o‘rganish, ilmiy natijalarni amaliyotga joriy etish hamda hududning ijtimoiy-iqtisodiy rivojiga munosib hissa qo‘shishni o‘zining ustuvor vazifalaridan biri deb biladi.

Fakultetimiz eshiklari bilim va fanga intilayotgan barcha yoshlar uchun doimo ochiq!

Fakultet tarixi

Tabiiy fanlar fakulteti 1965-yilda tashkil etilgan. Fakultet faoliyati davomida uning negizida bir qator yangi fakultetlar shakllangan.

Jumladan, 1971-yilda Fizika-matematika, 1988-yilda Pedagogika va psixologiya, 1992-yilda Iqtisodiyot hamda Ximiya, 1995-yilda Jismoniy madaniyat fakultetlari ajralib chiqqan.

1996-yilda Geografiya ta’lim yo‘nalishining fakultet tarkibiga qayta qo‘shilishi natijasida fakultet “Tabiiyot-geografiya” nomi bilan faoliyat yuritgan. Keyinchalik fakultet Tabiiy fanlar fakulteti sifatida shakllandi.

Bugungi kunda fakultet ko‘p yillik ilmiy-pedagogik an’analarni davom ettirgan holda, zamonaviy tabiiy fanlar bo‘yicha malakali kadrlar tayyorlash va ilmiy tadqiqotlarni rivojlantirishga xizmat qilmoqda.

Missiya va asosiy vazifalar

Missiya: Tabiiy fanlar sohasida chuqur bilim va amaliy ko‘nikmalarga ega, ilmiy tafakkurga tayangan, jamiyat va iqtisodiyot rivojiga hissa qo‘sha oladigan raqobatbardosh mutaxassislarni tayyorlash.

Ustuvor yo‘nalishlar

• sifatli va zamonaviy ta’limni ta’minlash;
• ilmiy-tadqiqot faoliyatini rivojlantirish;
• xalqaro hamkorlikni kengaytirish;
• talabalarni zamonaviy amaliy ko‘nikmalar bilan qurollantirish;
• mintaqaning ekologik holati va tabiiy resurslarini o‘rganishga hissa qo‘shish;
• ilmiy ishlanmalarni amaliyotga joriy etish;
• iqtidorli yoshlarni qo‘llab-quvvatlash.

Ta’lim yo‘nalishlari

Bakalavriat

Magistratura

Doktorantura

Fakultetda tabiiy fanlarning dolzarb yo‘nalishlari bo‘yicha ilmiy-tadqiqot faoliyati olib borilib, PhD va DSc darajasiga tayyorlash ishlari amalga oshiriladi.

Ilmiy-tadqiqot yo‘nalishlari

Zoologiya kafedrasi
Surxondaryo viloyati faunasi, biologik xilma-xilligi va zararkunandalarini tadqiq qilish, aniqlash hamda ularga qarshi kurash choralarini ishlab chiqish.

Botanika kafedrasi
Janubiy O‘zbekistonning efir moyli, asal-shirali va xomashyobop o‘simliklarini o‘rganish, istiqbolli turlarni aniqlash va ularni ishlab chiqarishga joriy etish.

Ekologiya va tuproqshunoslik kafedrasi
Atmosfera ifloslanishi va uni kamaytirish usullarini o‘rganish, tuproq unumdorligini oshirish va degradatsiyaning oldini olish, atrof-muhit muhofazasi va ekologik xavfsizlikni ta’minlash, o‘simliklar hosildorligiga organik va mineral o‘g‘itlarning ta’sirini tadqiq etish.

Geografiya kafedrasi
Surxondaryo viloyatida ishlab chiqarish kuchlarini joylashtirish va tabiiy resurslardan oqilona foydalanishda GIS texnologiyalarini qo‘llashning ilmiy-amaliy masalalarini tadqiq etish.

Infratuzilma

Fakultetda ta’lim jarayoni va ilmiy-tadqiqot faoliyatini samarali tashkil etish uchun zarur infratuzilma shakllantirilgan.

• O‘quv xonalari: 22 ta;
• O‘quv laboratoriyalari: 5 ta;
• Ilmiy laboratoriyalar: 2 ta;
• Kompyuter sinfi: 1 ta;
• Kutubxona: 100 o‘rinli;
• Talabalar turar joyi: 900 o‘rinli;
• Dala amaliyoti bazasi: Darband o‘quv-amaliyot bazasi.

Darband o‘quv-amaliyot bazasi talabalarning dala amaliyotlarini tashkil etish, nazariy bilimlarini amaliyot bilan uyg‘unlashtirish hamda tabiiy jarayonlarni bevosita kuzatish imkonini beradi.

Xalqaro hamkorlik

Fakultet xorijiy oliy ta’lim muassasalari va ilmiy markazlar bilan hamkorlikni izchil rivojlantirib kelmoqda. Bugungi kunda 12 ta xorijiy universitet va ilmiy markaz bilan hamkorlik aloqalari yo‘lga qo‘yilgan.

Hamkorlikning asosiy yo‘nalishlari professor-o‘qituvchilarning malakasini oshirish, talabalar amaliyotini tashkil etish, qo‘shma ta’lim dasturlarini rivojlantirish hamda ilmiy-tadqiqot loyihalarini amalga oshirishdan iborat.

Hamkorlik qilinayotgan xorijiy oliy ta’lim muassasalaridan ayrimlari:

• Belarus davlat universiteti — professor-o‘qituvchilar malakasini oshirish;
• Abay nomidagi Qozoq milliy pedagogika universiteti — professor-o‘qituvchilar malakasini oshirish;
• Novosibirsk davlat universiteti — professor-o‘qituvchilar malakasini oshirish;
• M.V. Lomonosov nomidagi Moskva davlat universiteti — talabalar amaliyoti va professor-o‘qituvchilar malakasini oshirish;
• Indoneziya pedagogika universiteti — qo‘shma ta’lim dasturlarini rivojlantirish.
• Al Farobiy Nomidagi Qozog'iston Milliy Universiteti — talabalar amaliyoti va professor-o‘qituvchilar malakasini oshirish;

Yutuqlar va ko‘rsatkichlar

Fakultet talabalari so‘nggi yillarda ilmiy va ta’limiy loyihalar, xalqaro ilmiy konferensiyalar hamda davlat stipendiyalari tanlovlarida faol ishtirok etib kelmoqda.

Talabalar yutuqlari

• so‘nggi 3 yil davomida 28 nafar talaba xalqaro ilmiy anjumanlarda ishtirok etgan;
• 2 nafar talaba Islom Karimov nomidagi Davlat stipendiyasi g‘olibi bo‘lgan;
• 2 nafar talaba Bobur nomidagi Davlat stipendiyasi g‘olibi bo‘lgan;
• 1 nafar talaba Beruniy nomidagi Davlat stipendiyasi g‘olibi bo‘lgan.

Bitiruvchilar bandligi

Fakultet bitiruvchilarining ish bilan ta’minlanish darajasi 92 foizni tashkil etadi.

Bu ko‘rsatkich fakultetda berilayotgan bilim va amaliy ko‘nikmalarning mehnat bozori talablariga mosligini ko‘rsatuvchi muhim mezonlardan biridir.

Talabalar hayoti

Fakultetda talabalarning ta’lim olishi bilan bir qatorda ularning ilmiy, ijodiy va sport faoliyatini rivojlantirish uchun ham keng imkoniyatlar yaratilgan.

Talabalar:

• ilmiy to‘garaklar va talabalar ilmiy jamiyatlarida ishtirok etish;
• ilmiy konferensiya, seminar va olimpiadalarda qatnashish;
• sport musobaqalarida o‘z mahoratini namoyish etish;
• ijodiy klublar faoliyatida ishtirok etish;
• grantlar va davlat stipendiyalariga da’vogarlik qilish;
• xalqaro akademik almashinuv dasturlarida qatnashish imkoniyatiga ega.

Fakultet talabalarning tashabbuslarini qo‘llab-quvvatlash, ularning bo‘sh vaqtini mazmunli tashkil etish va intellektual salohiyatini rivojlantirishga alohida e’tibor qaratadi.

Talabalik — bu nafaqat bilim olish, balki yangi g‘oyalar yaratish, ilmiy izlanish, do‘stlik va kelajak sari dadil qadam tashlash davridir!

Aloqa ma’lumotlari

Manzil: O‘zbekiston Respublikasi, Surxondaryo viloyati, Termiz shahri, Shimoliy darvoza, Soatov ko‘chasi, 13, B-burilish.

Telefon: +998 93 799-20-03, +998 97 786-38-47

Elektron pochta: tff@tersu.uz

Ish vaqti: 08:00–17:00